یتھ فرصلس چشمن سرٛیہہ پُر جوش

ییٚتہِ گیانس عرفانُک موٚت ہوش

گلہٕ لالن امنہٕ  کُے آغوش

ییٚتہِ بُمبُر یمبٕرزلُک مدہوش

اَسہِ اسلافن ہٕنٛز ستھ تے ماے                         وِزِ وِزِ اسہِ آیُت تِہندُے پاے

دلہٕ جگرس منٛز اسہِ تمہٕ نٕے جاے                    تھوو تِہندیٚن نادن ہر وِزِ غوش

یتھ فرصلس چشمن سرٛیہہ پُر جوش

ییٚتہِ گیانس عرفانُک موٚت ہوش

گلہٕ لالن امنہٕ  کُے آغوش

ییٚتہِ بُمبُر یمبٕرزلُک مدہوش

ؤلِو لول برو یتھ گلستانس                          رنٛگہٕ زوٗل کَرو پرٛیٚتھ استانس

منگ سٲنۍ رتھ کھسہِ استانس                   پھۄلہِ باغ تہٕ ژلہِ غمُکے آغۄش

یتھ فرصلس چشمن سرٛیہہ پُر جوش

ییٚتہِ گیانس عرفانُک موٚت ہوش

گلہٕ لالن امنہٕ  کُے آغوش

ییٚتہِ بُمبُر یمبٕرزلُک مدہوش

پانٛژادر ناگہٕ بالٕچ رحمت                               شیخ پالٕچ شِل أچھن شہلتھ

جۄے ارزٕنۍ شلہٕ چی فرحت                        ییٚتہِ عبد تے معبودی مہروش

یتھ فرصلس چشمن سرٛیہہ پُر جوش

ییٚتہِ گیانس عرفانُک موٚت ہوش

گلہٕ لالن امنہٕ  کُے آغوش

ییٚتہِ بُمبُر یمبٕرزلُک مدہوش

یہِ چھُ لل دیٚد ؔتے نند ریٚشۍ ؔسُند مسکن                 نٲظم ؔتے اسد شاہ ؔسُند آنگن

اقبال ؔتے نہرو ؔییٚتہِ درمن                   نیلہٕ ناگ نوٚو پرٛانان پمپوش

یتھ فرصلس چشمن سرٛیہہ پُر جوش

ییٚتہِ گیانس عرفانُک موٚت ہوش

گلہٕ لالن امنہٕ  کُے آغوش

ییٚتہِ بُمبُر یمبٕرزلُک مدہوش

یہِ چھُ مالیٚن آیُت فرضہٕ دیٚدِ ہُند                         یہِ چھُ ماتامال زی خطجہِ پۄپھُن

جانہِ زیبس خۄرشہِ دل چھُ پھۄلن                       کانٛٹہٕ مال ؔتہٕ لسہٕ کاکھ ؔآدن پوش

یتھ فرصلس چشمن سرٛیہہ پُر جوش

ییٚتہِ گیانس عرفانُک موٚت ہوش

گلہٕ لالن امنہٕ  کُے آغوش

ییٚتہِ بُمبُر یمبٕرزلُک مدہوش

عیار ؔیار باش ییٚمہِ باغٕکۍ گُل                             نٲظر،دُرٲنی حسنُک مس میٚل

حسرت  ؔییٛمہِ جوہرکُے بلبل                           مرغوٗبؔ، ملک اَسہِ بردوش

(ڈاکٹر حسرت حسین)